Paleung Kadawn Sai Kangtha Tapen Ai Nai Sai

By: Ai James San Aung (Samleaung leangngau)

Tameuh my ang sa pi nai apu parai nai Khumi pri ly tlamsa nai pri lawn jo jo sy.Vaini khaileaung pri y awm nai khumi cheang takhar chi i pasa tangka nang nai, kaba ve rei y khumi areng lawn naily mama mang i dengdai amtleh takhra ai nai ngai mo nabaly, paleung theung mang i dengdai rei kadawn sai taucheng naira kangtha tapen ai nai aly ngai na nai pany pajau nai ne.
Khumi chengchi ly khri pa-rei paleung hawi p’rai nai, amrawi p’rai nai hawi leaung leaung rei pasa tangka awm lawh baly pasai y nai leaung leaugrei sabawn leungtang nai ne. Kalam mang i cheng takhra avymchi tym nai khala y py amotheu parai nai hawi my my mychi i yhm hlau y pacho panei nai ne. Kasilo tym bo nabaly, apui parai nai avang pui ra y avang
saleaungchi i yhm kangtha sa nai neng tym bo nabaly; a sabawn leung tang nai ne.

Jangni amsi pajochi i deung kha i dengdai rei huna nai kalop kahawi chily vaini khrai rei patawm jo jo nai ne. Na i py, vaini nawi keh nai khumicho chi ly h’m hawi ra ai khri khri pa-rei khrei keh nai ne.
Kaimy i cheaung lyn nai neng khala y dawn ali teang ai na baly, nawi keh nai kaimy i ahawi ni pui chi ly cha amtiu nai tleaung y ly, h’m hawi ra mang y abang keh lawh nai ba.
“H’m hawi ra” teaung nai deaungkho y ahawi nipuichi hawi leu khulym amsaw ai nai nai kamta ly hawi y nai lam mang y khumi neang neang chi ai pahawi reng nai ne. H’m hawi ra nei nai deaungkho y ajo sam y nai ahawi phyrei chi malawn py ajo nai awm lawh nai ba. Naibaly, khri khri pa-rei khrei ahawi nai aju hawi javo salam amprei hai ai nai lam tiu pi nai py h’m hawi ra my ne amjo amnau chi awi.
Vaini nawi keh nai deung kangthau khumi thawideang hawi anglochi py cheaung lyn nai bova khala y , cha ai hawi hai palai phain y pui naimy; khaileaung pri i ngai phi teng y nai lam mang y abang vui nai chi nawi lawh bo he. Cha amtiu thyn nai thawideang anglo ngai parai nai chi awi, nang chi ly momang  i vui nang mychi i heng nai sala y hawi ai nai hawi amychi deaungkho y khumi pri hawi naira lam mang y kaura kaura ai nai vui atho sa ai nai vai neng tym bo. Khawndam sa ai na nai dawn moh, vaini ly khawndam i vui hawi keh nai lam tiu yb ai nai aly ngai. Naibaly, nangchi i bova y ta( goal) na pi nai awm ai nai khri pa-rei aly ngai ba. Ta by y ai na baly, nang momang y mana kau pa-rei tako pajau ai mo; adawn u cham be.
Kai katlen chung nai saneng 2011 khala y Japan pri y cha amtiu ai nai chei nai tla. Hu y awm nai sala y kani rei nai kha y, kaichi cheaung mang i kavo sa pi nai dengdai rei Japan pri y awm nai Neam’chyUniversity ra y chei i; cheaungtabichi ai cha patiu nai ne. Hunai thym kha y nichi ai kai leu sai harei deng nai awm. Huni leu sai ly, “Nang university lyn pajau bo khala y nang my i ta ly ati majyp mo?” (What is your goal for your life after your study?”) na nai deng.
Naibaly, phyrei anglochi ly ‘ Aju kahawi lawn ai nai, javo kahawi ngai ai nai’ na nai pathang, phyerei anglochi my ly ‘Bamiton’ amau kau nai amyn kahawi lawn ai nai’ na nai bawi bawi chi patang nai awm. Meitang khyp thui ai na baly, university lyn nai ly javo kahawi nga ai nai, nai baly amau naira amyn amthang ai nai vui lyn nai ny y nai ne. Miteaung keh lawn ai nai, Engineer lawn ai nai hawi kalang takhra kalop kalen chi nga thai ai nai pathang na khyly hawi keh nai ne.
Hunaideaungkho, vaini khumi deung kangthau chi ai taviu ai nai ngai nai ly ‘Nangchi cheaung lyn nai khala y py nesy, university lyn nai khala y py nesy; naibaly kalang takhra chachi amtiu kha y py nesy, ta hawi hai palai khai iy amtiu u ba na nai kai thui pi ai ngai.
Tumbaly, kaimy i cheng naira, ti y baly, pany thai nai hawi thui ai nabaly, Akei ai bo tlum na parei taphra
pajau naily deangkeaung hudaichi ne nai   kamta ly; khumi cheangchi ai taphra naily h’mra ne na nai pany u be be ai nai aly ngai nai ne ba.
Khumi deungkang thau thawideang anglochi awi, khumi pri apu parai nai, cheang ra hawi kawi nai, NGOs kalop meingtym kalen ra y ateh pajau iy bilai leu hawi pri takhra mang dengdairei tym nai avymchi ai lam patei pajau nai hawi nichi i leu tapreang pi pajau nai keung chi lawn ai nai atho so sina ba. H’mra nei nai ly anawn vaimy anawn praw iy amychi i pri ai palum ai nai paleung kadawn sai kahawi chi avei rym jau be.
Vaini hini Khumi Media Group mang dengdairei amychi i saleaung,cheang, khumi reita hawi cha ai khri nai paleung hawi palum jo jo sina ba. Tamang nai awm baly pahen pi kyh ba.
Khumi pri ly deungtasa rei avang nai pri lawn jo jo sy! Amen.