"Khumi Cheang Theaung Chi Awi Mo mang Tako Ly Khumi Pri Hawi Ai Nai Atho So"

Khumi amjo amnau chi awi,achi i pri ly amotheu naira awm thai ai nai vaini nang hawi kai vanrei amkawm nai my atho sa ai nai aly ngai bo he. Khumi cha ly achi cheng i vui ne na nai pany nai hawi my amtiu takeng kei ai nai aly ngai bo he. Khumi cha na nai ly Kristianchi i cha ny y leang. Achi bawi bawi i cha kalen, leu kalen harei py ne ba.
Vaini achi i ado nai hawi sa amteaung nai Khumi Media Group na naily huni chi bawi bawi vui angdo hai nai ne ba. Japang Ra-awi satang cha ly achi khumi cheng bawi bawi chi i vui ne ba. KMG mang dengdairei khumi cheng chi mei avang hai iy, amychi i cha ai khumi luteng pany thai ai nai vui atho sa nai media harei py ne ba.
Achi khumi cheng ly Tameuh tamai my kani hawi khaileaung palum angchei kha i dengdairei awm y nai meingtym kalen harei py ne ba. Vaini tawdeng anglochi awi, nang chi bawi bawi ly amychi i cheng ai khrei ai nai khri pa-rei aly len na nai sai pany u ai nai kang taviu nai ne ba. Khumi ne bo nabaly amy i cheng theung y yhm theaung asa ai nai tla. Kalang cheng theung y awm vui bo na baly khawn vai kha y ly achi i cheng, leu hawi reita kapu chi py tama be be ai nai ne.
Amhm ampo, amsi pajo ngai parai nai chi awi, nang chi ly amy i katu chanau chi ai amy khumi cheng i leu kawp hai parei atho so hai ba. Khaileaung pri y leu cheaung khang awm nai theung y nang hawi kai i leu ly aly len keh nai ne ba. Khumi ne kha y khumi leu kawp y ai na baly, nang i khumi lawn nai ly kamrang awm rai na a? Hini leu sai ai nang hawi hai palai adawn cham rai ba. Amy i leu kawp y ry rei ly achi i pri ly mana kha la y py avang nai pri, cheng naira kawi nai pri hawi amotheu nai pri py lawn ai ne y leang na nai py pany u jau.
KMG ly vaini nang hawi kai i amotheu nai hawi my amkawm iy sa tla nai kalop harei ne. Vaini nang hawi kai i patang naira, rai naira hawi paleung bi naira avum nai chi ai pri takhra awm nai khumi cheng cheaung khang chi teng y amti pi nai media harei ne.
KMG ly vaini tunya(0) mang dengdairei amteaung nai ne. Lusa nai chi py amy khumi cheang ai khrei nai paleung hawi my kalop sa ai nai vui a-au nai amojo amnau chi ai khen iy vawi patyp nai ne.
Khumi pri ly mu hawi kaseaung pauchy kamta lawn jo sy! Amen

Ai James San Aung,Yangon