I RA I NAI VAIMY ANGTHAU PRAW LY MOMANG I VUI VAINI ANGVEI U RYM

Achi Khumi pri ly jangni dengdairei amsi pajochi my tamo y parei ando hai typ na nai ne ba. Japang tavo pui ly tawisyh mang India pri mang i dengdairei apu p’rai naimy tawikalawi mang y leaung kathiu nai ne. Japang peang y nihcho tym baly tui peangchi ai tui len bo nabaly tui my um be nai ne. Tui len and jaw ryh jaw ryh bo na baly sabai bai ai hawi nai sabai prangchi amteng ry nai ne. Hunai kamta Japang peang y sabai sa ai nai chei kathiu chei kalau nai palang katynchi ly apu p’rai nai taro champrai kamta thai nai keungchi i kano theung y savai hai ro na nai ne.

Avang tlei y awm nai Amhm Ampo amjo amnau ngai parai nai chi awi, nangchi ly achi pri y tiu sa nai kramochi hawi y sa nai chi ai kiu takawi phyh nai my vaini khen veng veng rai a? Vaini achi khumi cheng theaung bawi bawichi vanrei amkawm iy a-eu ai nai neng tym bo.

Palangvum mary ly Kramochi i pri ne y, achi i Chin pri harei ne. ALP pi jeung ly manai khala y py Palangvum mary theung y awm sang y. Vaini Palangvum mary y awm nai seng jo nai khumi amjo amnau ngai parai naichi awi, nangchi ly amy i leu ai tamu khai y pui nai my Kramochi i leu ai salo mang khai iy katheu jo jo rai a? Vaini nangchi adawn cham be. Vaimy amtle takhra hy jau.

Vaini khumi areng kanang bawi bawichi awi, nangchi ly vanrei amkawm ly Palangvum mary y Hotel sa mang me ai nai atho sa u ai nai lam patei pi ai nai ngai nai ne. Vaini nangchi my so y baly khawn vai kani kha y ly Kramochi ly meingtym kalen la vui ai na nai KMG mei hawi dengdairei niu lawn nai ne ba. Palangvum kapeang y awm nai khaileaung ngerei ly mana khala y py Kramochi teng y jo y ai nai py nangchi areng kanangchi vanrei amkawm iy khumi cheng theaung bawi bawi chi pany thai ai nai vui satang thai hai kyh ba. Khumi chengchi i Biu Seng, Lapha Seng, Computer Seng, Cha-iu Seng, hawi kalang takhra khra seng cheaungkhang chi vaini dengdairei nangchi amkawm iy atho so jau ba. 

Education department ra y meingtym la thai ai nai vaini achi khumi chengchi atho sa ai nai aly ngai nai ne. Hini hawi amtawm iy y thui ai na baly vaini cha amtiu thym nai thawndeng anglo bawi bawi chi ly Kramochi tleaung y atho sa ai nai khri pa-rei aly ngai nai ne. Vaini achi khumi deungkang thau bawi bawi chi ly Bilai cha(English) kawp thai ai nai vui atho sa ai nai khri pa-rei ngai rai. Khawn vai y ly Bilai leu kawp y pui baly kalop kahawi nga thai ai ny leang bo he.

Satang tajiu nai keung: Samleaung lengngau, Khumi pri