Pyhnjo Pyhnthai Achih

Jangni y luhyhm angpu na pie nai Pyhnjo ni Pyhnthai ly awm nai neng. Thawndeang Pyhnthai ly anglo pyhnjo, anglo ateang nanai thai nai deaungkho y, anglo Pyhnjo khen y mai pataw nai kie bo. Mai pataw baly leaung leaungrie kaseaung khurai naly, mui amlym lawh nai, mui aly nai deaugnkho y, “Anil y apum ahawi sina ba”. Apum ahawi baly amprei ahawi ny y nabo.”  Emphu emphai tava akhawi iy amprei ngang, deih iy patawi iy, maipui maithang saleung y amprei ahawi ngang, nanai adeu nai teu khyh my, thawndeang anglochie teang reng nai leusai, teaung teu teu khyh my sarau hmu khaing chang y ti.
Na i py nini apum ahawi ai nai ngo y bo. Thawndeang Pyhnthai ly nuro jeaungdicho; kamawn kangtengcho neng nai deaungkho y anglo Pyhnjo i amh’m ampo ly, “Lo awi! Nangni ly so moh ba, i ahawi lawh naly, Nang i tlang tleaung y, Ngamh’m Ngampo kaini pateaung nai, pahu sangka teaung kajeaung nai, sileingkeung y areng sorai tolam kani y, lam nai, lam
amprie baw chang nai hini ateaungalang chie ly angbeung sum y dengra kheih krai ai cham be? Tu-i, kang ngai hai y lawh ly, nanai thuipie bo.
Apum tangnga ai nai adawn teu nil y, apum thai y bo. Apum ai nai avo y naira tym lawh bo. Nai deaungkho y Khumi paleung lawn lawh nai deaungkho y thawndeang anglo akhrei nail y leu ka-hum thui nail y, “Tui theung I ngo matem muithang pany y nai”, thai nanai ani amprei ahawi ny y nai, leu arum nai kany y nai”, thai nanai ani amprie ahawi ny y nai, leu arum nai kaym kang pai khai nai teu khyh my, i ahawi nai amprei theu y bo.
Na I py amh’m ampo my paleung pathyhm angngai hai y bo. Nuro jeaundicho ly, kamawn katicho I, hunai deaungkho y hawi y leang, pei y akhie kan nai y, “Aw! Kai i khrei nai, ngai nai hawi ngo y baly, Ni bo y neampacho kangmeing kangtha, Juvo kangmeing kangtha nang lawh baly Kai i tamo ahcho meih kamju teing lawh teu iy py Cho angsai na-y, Deih veing khyh bo e! nanai paleung dawn lawh bo.
Naibaly, Aw! Tavawi awi kai ail y nei ngaai ni my ngai hai y lawh i, mana ai mo? Kai I paleung kadawn ly pipi amprei ai nai ngai y i ani ly, atira amprei ai mo? Nabaly, miteaung acheang iy ephu ephai tava y deih aprei ahawi ngang ai bo. Maipui maithang saleung, akui savai saleung y amprei ahawi ngang ai nanai paleung kadawn jo khyh bo. Ngaai my paleung pathyhm angngai hai y a?
Nabaly, Kai ly deih veing teu bo i, nang ly mana mo? Napie bo. Aw! Tavawi y, Nang I paleung kamta, nang  hawi apum ngo y leang nabaly ani deih ahawi si y!.. adawn lawh iy, Tlaupui Tlauran tuili y, tui taba veing khyh bo, nanai adawn ahawi bo. Naibaly nini ly Tlaupui Tlauran tuili y taba hawi bo. Samteung lam phro i, sam palawn patawm ahawi iy sui ahawi bo. Leaung leaungrie khrie paleung kheih y nai deaungkho y, paleung angai y nai deaungkho y deih ahawi mei nai neng.
Nanai cum baly tavau mang  y amprie jo bo a? Amprei y rai. Ho! Tlaupui Tlauran tuili kheuthiep ra i jangrai anui y kani pathum baly, po teang bo. Mgolum ngprai veu peaung na ly po teang lawh bo. Ho y veu peaung baly, nini amprei ahawi bo a? Amprei y asai rai. Ho! Tavokalawi mang y ajau jo na i, rau-u rausang saleaung y langsu langpheang lawn ahawi jo bo.
Naibaly huni Pyhnjo Pyhnthai  i taba ahawi nai tuili ly Sangla tavo theung I, Tleung Avang akui Tleung tahawi leing i jawnjai, huni Tuili neng. Huni Tuili ly Kalang meihrei pala kathiu i y avaw nai tla.