Singapore y Yhn kalop sa nai Khumi Anglo Pathui vui bo

Yangon, Pauhu 12

Singapore y amii yhm y kalop lo (10)rei sa i, kalop sa nai lakha ly lo rei y S$420 rei nga teu iy py ni ai ly lo rei y S$20 rei pei khyh i huni bo i awm rai nai ni i lakha bawi ai ly Singpore pawi-cha Daw Ei Li my ni i areng teng i nai lo tleirei kalop sa nai keung theu y kyh rai kha y tangka ai ly thiu mang me veng nai ne deaungkho y ngan tlang hawi paleung chi py atho di naira avum bo na pi. Hunai kamta khri pa-rei akhun na nai, leu khulym kho na nai kalop yhm keung deaungkho y paleung malawn py kateng kataw by y bo i, kakhyn katyn ai ly Yangon mary mang y tha- su nai Palangvum mary, Tangkhawn avang y awm nai saneng 25 rei awm nai Ma Eaung Nang ai ly Yangon Kangkheang kawn y Yangon mang i pawi-cha Daw Si Peng chi my tui hnei rai na pi i, huni tui ai hnei beng nai neng kha i dengdai rei sadi pany y veng bo ti na nai Ma Eaung Nang i amjo Ai Eaung Thai my KMG mang y satang thai hai praw nai ne.

Singapore mang dengdai rei Yangon Sau-mau lo kani 28 kha tym nai ne teu iy py pawi-cha Daw Si Peng my my my i yhm y palau vui na pi. Huni satang y thai nai dengdai rei amjo Ai Eaung Thai ly pawi-cha Daw Si Peng i yhm y chei iy mymy i tochu ai palau iy py, Ma Eaung Nang ai ly patheu pi y, yhm atheung y heu vui na pi.

“Kai tlen thom rei palau. Na i py yhm atheung mang i dengdai rei angam mang y patheu pi y. Hunai deaungkho y kai py paleung bi nai hawi my kalen chung nai Pauhu lo 12 kani y bilei(Policemen) chi hawi palau ai nai kavo sa tanga nai ne” na nai Ai Eaung Thai my thui.

Singapore i Ma Eaung Nang i kalop yhm keung chi ly Singapore tareu khumi chi ne na nai pany. “ Hini satang bawi bawi chi ai ly daichi mang awm nai mymy chi i amhm ampo chi teng y py satang thai hai yb bo. Pauhu lo kani 18 kha y Ma Eang Nang ai ly Yangon, Ywar Thar Gyi, Paleung mang i rawka chi hawi sa pi nai si-reung y pakun bo na pi. Nai baly pawi-cha Daw Si Peng ai ly Pauhu lo kani 12 kha y my bilei chi palau i deng nai ne. Bilei sakheang y my paleung rawka theu i atleng beung bo na pi. Vaily si-reung y awm na nai satang thai nai ne. Kai my py Ma Eaung Nang i vui kalop nawi nai deaungkho y ati sai py so pajau y bo” na nai Ma Eaung Nang i amjo Ai Eaung Thai my thui.

Ma Eaung Nang i thui pi nai leu ly kalop yhm keung chi my ana nai hawi my paleung ji tang nai chi tym hai i , paleung kateng by y nai khumi leaung rei kamta lawn vui nai y tha teang nai ne na pi. Yangon y awm nai my my i pawi-cha teng y kalop sa vang hnei teu iy py pei y nai y khumi jo nai tara lam hawi tarachih nai jeung y amti pi bo na nai satang nga nai ne.

Satang tha pi nai keung: Ai Eaung Thai, Yangon