AMAI ATHAI ACHIH (BYVY) LAWN NAI ACHIH

Vaichi ai saleaung avang areng sorai amploy Chaniu amai nyhrie sa bo. Chaniu chalu amyhn iy Thang tlyp nanai amyhn pathi.

Amnau I amyhn ly Amai nanai amyhn pathi bo.

Naibaly amh’m ampo nini kanirie kha y ly kaliep hlaumo angvai nai changpren poreung athyhn ai nai hlau y amawi kha baly, apai keung y tym khala, amh’m ampo my palau hai bo.

“Aw Lo awi, Thyhnag Tlyp awi, kani thun baly ngamnau Ami ly, kanu kang hai py, ami kangtlen ai bo. Tu-I kani thun ai nabaly nang ly amai athai kheih hai phiu iy byh hail y, huni pacho ba,” nanai amh’m ampo my taviu bo.

Naibaly kani thun tym bo nabaly,”Aw Kai y! Nei my Ngaai my taviu nai ly,vai ly be ly kanu kasam py anglam ai bo, bui an biuchyhm py alam ai nai neing tym bo; kai ly amai byh hai khyh bo”, nanai adawn bo. Mymy ly amti amjang amai palawn y I, thai kano athlie nai deaungkoh y. Mymy I amnau ai byh ai nai dawn law bo.

“Aw Be awi, Vai ly kani py angthun du du bo, kanu kanghai ly amai kangtlen; biu an kanglam (ka-lam) py ami kangtlen, nang ly alam lawh bo I, amai byh hai khyh bo; Tu I, nang ly tui ahiu rai,” napie iy amnau ai ateh hai iy, tui pahiu pie bo.

Naibaly tui pahiu pyhn nai bo y, amjo ly akei ka-ta I, akei ly chiu khrang na bo. Oh! Be awi, nang ai kai ly kang padeih vui ai tla lawh na-a ly, mana padeih aim o? hi ly! Nanai adawn kha baly padeih y leang bo nanai adawn bie bo.

Tu-I py nei my Ngaai my ly amai athai keih phiu iy byh hai napie nai ang tavui lawh nai deaungkho y, kai ly byh tangnga y baly Nein i Ngaai ni vawi kha y, Kai ai angjo ai bo, nanai adawn lawh bo. Aw! Na I py padeih tangnga ai tla bo I, akei hawi kangtleh bo he, nanai palyhm baly amanau ly panui keleke lawh bo, Tu-I py amh’m ampo I tavai nai leu ly tangai ai nai tla napie nai dawn nai deaungkho y amnau Amai ail y ateing ka iy abai piupa chum baly ly-awm pui ai thiu iy tui sa ru I, mathu thumrie salo y pateang iy byh vui bo.

Nai baly kani dyn ryh, dyn ryh, kani kareu neing tym bo. Tum baly, aju my napie ti juvo ai;- “Awi..juvo awi, vai ly kani py ka-reu bo, tu-I vawi sin abo; Tuisamdaw teu matengrie (matenrie) ahie meingmeaung I veing ai bo, vawi sana,” napie bo. Nini aju juvo ly vawi hawi bo yhm y tym bo.

A paikeung law, myni I khailei takeung y tym baly Amai, chanau Amai ly kawn y lawh bo. Naibaly amh’m ampo paleung ka-dawn mana awm mo nabaly, vaichi kha ly kaliep hlaumo sa nai vawi kha khailei takeung , kheubyhn tluih nabaly, Nei awi, Nei awi Ngaai awi, Ngaiai awi, nanai my angkawn kalake jhyh ny-y; vaini ly kai I chanau ly kawn y lawh hi ly, mana lawh mo? Na iy chaniu chalu anglo Thang tlyp ai palau bo.

“Lo awi, Ngamnau Amai ly ati ma y lei veing sai?Keaungno lawh kha? I lawh kha?” nanai deing bo. Naibaly Chaniu kalen my ly: “Aw I y leang, Keaung py no y leang; Hoh Avang lu mang y, simeung sitang cho mukie acham nai khen ai nail eh jo nai teu napie I, “Awi! Tumbaly vai angtym ai teu la-oh?” Tym ai tu,” napie I, ajeing jo bo. Ajeing jo teu iy py, tym y deaungkho y; “Aw mana, Ngamnau ly tym y jo be, naibaly,” napie bie I, “Ny y leang, lamlawi mang y, a cho kang vai, a cho Tleanglyhm pakun nai khen jo ngaw khyh, vai vawi naming,” napie bie bo.

Naibaly amh’m ly paleung hawi y I, “Mana nai, vai khrarie tym y jo ly, ngamh’m Kai I, sabo kheaungtum kangveih ly painyh, pathum bo ly,” nanai josei bo. Na I py ati py neng sy ly, biu an anglam nai kheing tym bo.

Amy I takeang keung y ati ti an theaung mo? Kai y! nanai adawn ti na-I, an ly-awm khen cham baly, chanau Amai I ngan ly alai ly-awm pui y byh mang nai niu lawh bo. Naibaly Amh’m ampo ly khri khri parie kado theu bo. Mana lawh mo ly! Amai ai tleh kaka iy mana nai byh hup hup  lawh mo? Kai jy!.

Kai jy, kai jy na iy, tuitheaung tawn nai angreng phei atheu I, chanau chalu anglo Thang tlyp ai ly pakhau teu teu bo, Amh’m my pakhau nai chang y i. ampo py kado theu teang I, vuinum, vuiha Hoh! Maihang kamreang atheu iy pakhau ra bie bo. Naibaly anglo Thang Tlyp I tlangtleaung  ly dengki karam mi palyhn kamta, pasen jawn na bo.

Huni khyh cham y rai ampo my:-“Nang deaungdi hina tanrie, ngamnau ai ati mana nai tleh kaka vui mo Kai jy!” nanai josei I, kawm ta-eang iy, kani bi ra  y jai rai lawh bo. Hunai kha baly chanau ly, “kai jy, vain i kha, Kai hina tan parie no patang nai, hini khaileaung pri y heing nail y, kai ly ati sai py neng y leang bo. Kadeih alam ai bo; Deih iy Kai l ati lawn ai ngai mo? Nabaly, Kai ly “Byvy” lawn teng teu ai khyh bo.

Momang kamtyh chi my, tleaungri panyhchie my Kai ai, hamhawi tabau keung anui y a-awi teu sy,” nanai paleung adawn lawh nai deaungkho y, anglo Thang Tlyp ly Byvy lawn jo nai tla bo.

Hunai deaungkho y Hlaupo kani I katheu nai Cheing-ie ly Byvy, Byvy, Byvy nanai hang nail y amnau ai “ Be awi, Be awi, Be awi nanai palau nai neng napie bo.