Interview to U Kyaw Nyein, Minister of Forestry and Mining, Chin State

Deing  : Hello Saya Kyaw Nyein a?
Pathang  : Ne hei, ami nai mo tho?

Deing  : Kai ly Peter Lawilu hei, Yangon mang palau nai.
Pathang  : Aww.. thui be.

Deing  : Khumi pri kavui kai chi I pado nai Khumi Media Kamkawm satang ly sara thai bo my  pany y.
Pathang  : Aww.. Nang Sai my thui pie mang yh.

Deing   : Huni KMG ly Japang Ra-awi na iy Khumi satang cha ha rie patheu ai nai sa nai tla. Hunai deaungkho y KMG pado nai satang athai hai tarawi Sara nang y interview sa ngai ry nai hei.
Pathang  : Nga chy.. thui be.



Deing     : Sara nang vai ati department y amkawp nai mo?
Pathang  : Vai kai ly Forestry hawi Mining Minister ne tla. Mipui my vawi nai ne.

Deing     : Sara nang I patyp nail y ati mo?
Pathang  : Aniu y awm jo nai chi kavui mipui kangai sa iy salo y tym thai ai nai kavui atho sa pie ai nai ne.

Deing      : Nabaly jangvai ni Chin pri lu sa keung chi achi Palangvum mang y chei nanai satang thai nai tla, thui pie pajau na a?
Pathang   : Thui ai nabaly sau prai..Chei ra y abawi nai chi ly State Chief minister Hung Ngai, Minister of Development department, Minister of Agriculture & Animals husbandry hawi kai, kai chi leaung palyhn rie ne. Minbu kapeng Paden y dyn rie ii, nabaly Kramo pri Myauk Oo y dyn rie ii, huni mang I nai ly Tanthaung ry tym I mipui chi hawi avum pawi sa nai ne. Mipui chi I ngai nai chi ai thui ai nai neing pei nai tla. Khawn mang baly Tanthaung I nai Kramo pri CheuTo mary y vum jei nai ne. Cheu To mang I nai Puivum y biu cha, Puivum mang I nai baly Sami y chei kalau I dyn rie ii nai tla. Hu y py mipui avum pawi sa nai ne. Sami mang I nai vawi kateung I  Miza vum y bui cha nai tla. Hu I nai Cheu Phra-Palangvum nanai chei nai ne. Palangvum Kimo hall ra y vum nari taja kaso nari ho rie ry rie avum pawi sa. Hu ni bo y Sarama Cha Su my Reikha mang y bui cha ai palau I Bishop mawi y anglo thawndeng chi my khulyhn kalang chi hawi lamchum nai ne.
Palangvum y kani ha rie awm nai tla. Palangvum I Cheaung chi, computer room chi py khen nai ne. Nabaly Pyin Nya A Lin library pa-eaung pie nai tla. Hunai bo y Asi yhn ry py khen I ngai nai chi ai thui taviu pie nai ne. Sat Twae Jei Jeung ry py chei I CDMA 6 rie pei nai teu ly Kramo chi my anen di chy sa pie kyh I Line hawi y nai tla. Hunai deaungkho y salo mang pado pasang pie ai nai thui pie nai ne. Mai padei nai yhn py chei bo y Reikha mang I cheaung ry py chei I khen nai ne. Hunibo y Na Ta La cheaung pa-eaung ai nai meitym chi py khen, Myay NiGone mang I tui pei nai tuikang ry py khen nai tla. Sa ai ngai nai chi ai py taviu nai ne. Sangpo sei I dawirai hawi Kaladan Multi-model transport project tlangtleaung y Salai Isaac Khen chi I sa thym nai sai chi ai py khen lei nai ne. Khawn mang baly Japang syh mang y lyhn kalau I Keing Lai y anawn tarawi Keinglai avang tleing klawi amteaung hai nai dawirai ry py khen nai tla. Keinglai avang I nai Numbu. Humang I nai kai I avang Sang Deu y khawn bui cha nai ne. Mipui avum pawi py sa nai tla. Monastery sa ai nai meitym chi py khen nai tla. Huni bo baly Dalama-Toram-Mheichy tei kalau I Mheichy ry dyn jei/ mipui chi hawi avum pawi sa nai ne. Mheichy avang y mary kangtha sa pajau ai nai kavui meitym chi py khen nai tla. Huni mang I nai baly Sanglavum ry dyn ii/ mipui hawi avum pawi sa nai ne. Khawn mang y mawitleaung mang keu hawi chei kalau I Su-E tavo dawirai sa ai nai py khen nai tla. Huni bo y TiuKrei Vum-PeaungMo-Warum chei kalau I Sang O ry khawn bui cha nai tla. Huni bo y Khanglyhn mawi lyhn, mai ngo y rai nai deaungkho y sa palai teng ai nai chi thui pachai pie nai tla. Khanglyhn y vum jei I huni mang I nai LalanPi ry dyn rie ii, huni mang I nail y Motor Cycle hawi ReiZaul mang deingdai rie Hakha mary pui y tym teng nai tla. Kani holai thum rie kra nai ne.

Deing  : Vaini palangvum mang I theu nai tlaungpang keung chi py Palangvum I amyhn hawi theu y nai my Kramo pri I amyhn hawi theu law nai kavui ati mana sa ai nai dawn mo?
Pathang  : Ne chy. Palangvum mang I theu nai chi ai ly Kramo pri mang y aku vui, Mindat,Matupi,Kanpalet mang I theu nai chi ly Magwae pri mang y aku vui, Hakha, Falam, Tedim, Thangtalang hawi TuanZam mang I theu nai chi ly Sagaing pri mang y aku vui nai tla. Huni bawi bawi chi y amy chi Chin pri I amyhn hawi nga teng ai nai kavui atho sa thym rai nai ne.

Deing    : Achi Palangvum ly Apu prai nai meitym ne teu I py kalang cheng khumi chi chei ai nai paleung atho pei ryh ryh y nanai kai ly adawn nai tla. Apu nai sai chi pasang ai nai kavui mana sa ai nai patyp pie mo, awm baly thui pie kyh cham be.
Pathang    : Awm chy. Mindat, Matupi hawi Kanpalet chi ly NatMa mawi awm nai deaungkho y amyhn asang nai tla. Achi Palangvum saleung ry ly Japang tavo py awm, apu prai nai mawi chi awm mang nai tla nai ne. Huni theung I Kimo mawi y eika 32768 ry rie Bei Mei mawi (ေဘးမဲ့ေတာင္) sa ai nai patyp bo ne. Tleng nyhn rie ly pathang pie bo I vai paithum tang bi ai nai hei.


Deing   : Palangvum khumi chi kavui lau kalu ha rie hawi hein ai nai atho sa rai y ly vaini I neing hawi ly apu y bo nanai adawn nai ne. Ati kalang bai chi sa baly hawi na mo thui pie kyh cham be.
Pathang  : Palangvum saleaung y ly Lie(လယ္ကြင္း) sa nga ai nai khaileaung saleaung kahawi chi awm mang rai.  Huni khaileaung kahawi chi ai patheaung pie ai nai atho sa ai nai ne.

Deing  : Mining mang I minister py phrei nai deaungkho y ha rie deing bi si. Achi khumi pri y ati kana van teing nai chi theu pajau na mo. Leu kabeaung y van teing nai leingseaung chi kana amjy chi be.
Pathang   : Awm chy. Amlo baly La Mawi I awm nai leingseaung y khen chang ai nai sa ai. Maisi hang (ေရနံ) lyMawn Theaung hawi Dalama tavo theung y awm nai meitym chi patei pie nai tla. Palangvum saleaung kyh cham y Tedim, Ngwe Taung ry py Ni Kal tai ai nai sa bo, Falam I Seingmo WaeBuLa py tai ai nga bo, Kanpalet, Yin Kwae Taung I Khanau Seing khen chang beng bo I tai ai nga bo.

Deing  : Palangvum seleaung hawi Khumi cheng kavui ati thui pie ai nai awm mo?
Pathang   : Mipui bawi bawi chi my sabawm I ai nai Loh Pa-kau thai ai kyh. Mipui chi my amy chi I khaileaung hawi deingkeaung theingreung chi ai tah’m khai I ai nai achi pri ly apu prai jo jo ai kyh ne. Nabaly, kai chi ly mipui chi ati ngai mo na nai tangai ryh ryh nai tla. Pri loh pa kau thai ai nai kalang NGO kamkawm kanawi chi ai py sabawm ai nai atho pei nai ne. Ami py ne sy lam kateing hawi pri kavui sabawm pajau atho sa pajau nai thui ngai nai ne.

Deing   : Nabaly Khumi Media Kamkawm pado nai tlangtleaung manai kamta adawn pie mo?
Pathang   : Ah balei, hawi phei phai kyh ne a. Khumi Media Group awm sang nai ly kra bo chy. Vaini nang chi my hinai kamta atho sa nai kai ly khri khri angmo theu prai nai ne.

Deing   : Sara amy chi ly Achora mang I lu kalen ne nai deaungkho y KMG y avaw rie atho pei khaw hai kyh ai nai ngai nai ne. KMG hawi amtawn iy avaw rie atho pei pie kyh ba.
Pathang   : Atho pei teu mang. Khumi pri kavui sa nai deaungkho y atho pei jojo ai teu mang.

Deing   : Sara amy ly email awm a?
Pathang   : Email by y rai he. Ngai baly cha hawi tajyh amtawn jo jo ba.

Deing   : Hinai kamta paleung sau prai nai my pathang pie nai khri khri parie kawm prai ba.
Pathang   : Kai py kawm prai. Vai momang y py phone palau teu ba.

Interview sa keung : Ai Peter LawiLu