KASAI HAWI TAKAI A-AWI NAI ACHIH

Jangni y unsi unla katheaung y, Tuilhm ly chanau cho teu bo. Huni kha baly ampu O-beu my ly, “Aw! Luhyhn awi, Nang ly hi y chanau charie py ajo lei y chy bo. Kha-um, Ralavum y ly ngolum ngoprai kapyh ly palo pau kangleung na-na chy bo. Hu ai phai tym hai be,” napie bo.

                Hunai kha, juvo tym baly, “juvo awi, pu O-bu my thui pie I, Kha-um Ralavum y ly ngolum ngoprai kapyh ly palo pau kangleung na-na ti, na I, “ Nang ly lo jo be, napie bo.

                Hunai kha baly Tuilyhn kalo ly, angkeang job a; Kha-um Ralavum y tym nai kha baly, ngolum ngo prai kapyh ly phawi veing bo. Naikha baly, “Awi kai ly! Vaini ly Kai ly chanau charie katiu ly kateing my y, vai ly ngolum ngo prai kapyh ly

ka-kai y veing bo.

                Na I py hini tuili paichi theung y ngolum amai, ngoprai amairie ngo teu na mo? Ka-miu kacham ai bo na bo. Naikha baly mymy ly tui theung y miu nai, miu nail y paha phi nai kha baly, kamdeing ly kyhn na bo. Hunai baly kha-um Ralavum I leing seaung phailang tleaung y pakhi bai iy, I jo bo. Hunai kha baly Kasai ni Takai ly khri parie ahawi adyh na I, tui nei ai nai vanrie sat la hawi bo. Hunai kha, tui nei ai nai khen tapai baly, “Aw, Nai awi, khen cham!Huni Tuilyhm ly kadeih mo?Kangheing mo?

                Leingseaung phailang tleaung y, pakhi jai nai ly khen cham nabo. Aw ne khyp chy  tu ly, kadeih ne y heing nai teu, heing nai teu: Ani a-awi sina,” napie bo.

                Kasai my, “Nang huni Tuilyhm pakhi ajai nai anglaw ry angkheang pajau a? Nabaly, Kai ai cho teu; Kai I hang nai kha kaimy pa-u nai kha y huni Tuilyhm pakhi aleu lawh baly, Nang ai kang padeih ai nanai a-awi hawi bo.

                Nai kamta a-awi kha baly, Kasai my, “Kai sa man ai,” napie bo. Kasai ly atho py len, tlang py len nai y a-ym nai ne. Hnai kha baly, tlenmy Kha-um Rala ta-un I theing pui theinglen keung hawi anawi nai, pa-eaung nai ly,ngaw, ngaw, ngaw na I kani ly bi ra bi r abo. Tuilyhm ly pakhijai hawi ra bo, Kasai ly atho pathau, pathau anawi bie. Kangkhyhm mang y ly huseih hudai py apyh apang I, anawi krai bo.

                Na I pyTuilyhm ly I hawi ra, Kani bi r abo. Hunai kha baly, “ Aw, Nai awi, Kai pajau y leang bo. Ani awi, Kai pajau y bo, tu-I nang ly so pa teu, Kai ly natang rie bo” nati. Takai I alie tla nai kha baly, Kha-um Ralavum I takai my hang nai kha baly Hoh! Khyteng taki mang I kani ly Khupanyhm a pui tierie panum deung I,  Kani khup na vui bo. Kani amai nai syh, syh tla kha baly, Tuilyhm ly, “Aw, Kai y! Vaini ly numpui numpai tuitup angchi lawh cho, hi ly!” na iy tlen rie my pakhi aleu kha, Tuichum mang y atlum jo bo.

                Hunai kha baly, Takai my pajau vui I, Kasai ly deih ai nai tla bo. “Aw, na I py, ani ahawi awi, kani saryh rie neing pei rai ba. Tu-I, Kai py Kaimy I apeaung akai y, katlai teang ai ngai rai, Kani saryhrie chih nai kani y Kai ai cho teu,” napie bo.

                Hunai kha baly Kasai ly tako bo. Tako nai kha baly meikatui theu tareaung neaung naimy tako jo bo. Tako mang baly, anteingtai keung pui ra y bajeung chie ly kawi na bo. Anteingtai kangmyhn abawm naira y tym bo. Naibaly bajeungchie my, “Aw Vaini ly ani Kasai awi, Nang ly mana lawh mo? Meikatui tareaung neaung na be? Paleung kadawn  hawi y na be, ati na lawh?” Kasai my “aw..na phai thui law ly, Hoh! Kha-um Ralavum y Tuilyhm pakhi jai nai ka-awi ra y Takai my pajau veing bo.                Kai ly kadeih ai nai teu bo, Kani saryh rie neing kaneih nai vai kang tako nai he; hunai deaungkho y, paleung hawi y nai, meihkatui tla nai chy bo.” Napie bo.

                Naibaly aw deih ai nai mati py ne sy, Kaichie hini keung pui anui y, alapa my angbeu ba.” Napie. Angheu, nai kha baly bajeung kanghuchie my anteingtai athai tapheu iy, pala hai nai ly, Kasai tlangtleaung y, anteingtai kangmyhn kawi na bo. Hunai kha baly Kani saryhrie py chih bo. Takai ly palai nai: lilau, lilau naimy tako leaunglang bo.

                “Aw nai Takai awi, nang ly vaini khri parie amo theu na ly! Ati nai aly awm nai mo? Takai my, Hoh! Kha-um Ralavum y Tuilyhm pakhi jai naira y, Kaini leu ka-awi, leu ajy naira pajau vuily. Kai ly nai y, Kasai ai kani saryhrie neing pei I, Vaini kani saryhrie chih bo he. Vaini ly Kasai mawi cha ai nai kai ly.Nai y Kasai mawi hau nai chy bo.”  Bajeung chie my “aw..tuteu I py Kasai mawi cha ai nai ngo naming ba. Tuni anteingtai kangmyhn phai cho vui rai,” napie bo. Jangni ly kadi hawi nai deaungkho y cha nai, cha nai, angteingtai kangmyhn ly, kheih lei y. Kasai ngan ai py tym y; Kajeu ly kawi palai na bo.

                “Mana Kai ly Kasai ngan y ly kavum y be.” “ Cho phai cho, Kasai ngan ai avum naming, Tuni kajeu kawi parie cho.” Cha veang veang, cha veang veang kha baly, Takai ly, “Aw Kasai ai kaniu I py kacho pajau y leang bo y! Nai bajeaung chie awi, Kai kacho pajau y leang bo, pajau y bo.” Kateingkyp pajau y a?Kateing kyp pajau y a?Kateing kyp a?( Kateing kyp)3 nanai tlen tyum rie pathang bo.

                Nai kha baly, Kasai ly kawn phi nai deaungkho y, anthau piu bo. Takai my, “Awi, nai awi Vaini ly nang ai kangcho pajau y leang bo. Khawnvai y nang chanau theu nai kha, nang I chanau ai kangcha ngaw ai,” nanai my tako jo bo.

                Naibaly Kasai ly kawm nai deaungkho y bajeung chie y mymy I muku no-peing kawn vang pei jo bo. Huni deaungkho y vaini bajeung chie I kano y tai nai sawitu, ngawitu (Maku, Tangka) napie nai ly Kasai my deih ra atleu nai kawn vang pei nai ne bo.