Tymlangmawi Pathi Nai Sai

Jangni y achi Khumi Cheng chi ly adyn ra y awm ai nai ngai y, mawitleung salo y harei awm ai nai ngai khyh nai ne. Ati mana nai y achi Khumi Cheng ly mawitleung y awm khyh nai moh nabaly; (1) Tuitleng, tuibai, tui len nai y ji nai, (2) Tavai y ji nai, (3) Mawitleung ly tavailan ne y nai, (4) Mawitleung ly tavaitiu nai khala y meingtyn hawi nai, huni bawibawi molan y achi Khumi Cheng ly mawitleung y awn khyh nai ne napi.

Takaung mang Abiracha ly mymy i meingtyn ra y chapo kathen Kanrachangei y pei vui nai deaungkho y chapo kalen Kanrachachi ly mymy i miseaung chi y hawih iy ampo yhm i nai preng bo napi. Naibaly mymy ly Keaungmomawi y tym i ho y saneng (24) rei mang sa rai napi.
Naibaly mymy ly Keaungmomawi y saneng (24) rei mang sa chung baly ho i nai teikalau i mawi kasang harei y avung bo napi. Mymy ly huni mawi ra y anawi i, mawi ahawi y awm nai Khumi chi y palau iy mawi salo y lang nai pawipui sa bo napi. Naibaly mymy ly huni mawi ra i nai tosi mang y teikalau jo bo napi.
Naibaly huni lang nai pawipui sa nai mawi ahawi y awm nai Khumi chi ly; huni mawi y ly Kanrachachi tym nai khala y lang nai meingtyn ne nai deaungkho y “Tymlangmawi” ne sy nanai amyn pathi bo napi. Hunai deaungkho y achi Khumi chi ly jangni i kaso vaini ry rei huni mawi y ly “Tymlangmawi” nanai palau nai my awm jojo bo napi.
Bawibawi y kawm p’rai ba. Noso hawi amang hawi nai my awm jojo sy.
Ngai p’rai nai my,
                           Ai Eaung Mo Len Theingri
                           Australia