Khumi Cheang I Yhmtheaung kamtym

Achi khumi ly cheang takhra takhra, theaung takhra takhra, amjy takhra takhra awm nia ne. Hunai deaungkho y hini khawilang nai saichi theu nai tla, napi.

-       Nang I cheang, kai I cheang;

-       Nang I theaung, kai I theaung;

-       Nang I amjy, kai I amjy;

-       Nang I yhmtheaung, kai I yhmtheaung kamtym, kai I yhmtheaung kamtym;

-       Nang I tui-mamcho, kai I tui-namcho;

Naibaly khen cham rai, tui-namcho na-nai ly thui pachai ai nai aly awm. Hini leu sail y tui-nam thawndeang salawn pangthai hawi khumi anglo Atlaw Atli nini, tavawi amprei nai achih theung i dengdai theu nai ne. Nini tavawi leungngai ly apom y, tavawi amprei nai kani y, tui-nam my kai i tavawineampachy i kajeu theung I deaungdi aneang nail y kai i cho, kai tui-nam i cho ne; tavawi amprei teu i py saneng pa-thom y kaimy i tui-nam cho ail y la ai “na-nai adeu i saneng pa-thom y tuibai theu hai iy la nai ne, nanai achimy pany bo. Huni tui-nam i cho napi nai leu sai dengdairei “Tui-namcho” napi nai leu maitawm teaung nai ne. Tui-namcho napi nail y kai i cheang, kai i amjy, napi nai sai py ne.

                Hunai deaungkho y achi khumichi i cheng kapalau ly ampo mang i dawn kha y amjy napi nai ne. Amh’m mang i cheang ai ly amjy napi nai palau vai y. Ati deaungkho y mo nabaly neampachychi ly juvo nang nai dengdai juvo i cheang, juvo theaung i reita, kabo kajah bawibawichi teaung ai nai tla ryp i, chaniuchi py juvo i amjy, juvo I cheang theaung ne nai deaungkho y ne. Naibaly vai ly yhmtheaung amtym leaungsai dawn sina.

Yhmtheaung amtym nai

                Jangni deung y amjoamnau, tuicho amprochi ly ampo i yhmtheaung ka-ti y paleung no iy tui mai acho y nai, khailei saiphyhn alyn y naichi awm reng nai ne.

                Yhmtheung amtym sang nai ly ami mo?

                Naibaly hinira y phy nyhrei dawn ai nai lam awm. Harei ly ampo i yhmtheung amtym ai nai hawi, nyhrei nai ly amjo amnau i yhmtheaung amtym ai nai reita ne. Khumichi i reita y ampo i yhmtheaung katui ly chapochi naini ampo i  lu-tleang ka-niu ti y baly lamtang ka-niuchi ne. Chapochi tleaungri lyhmlo amlawn y rai kha y ampo deih vui lawh baly amh’m ly chapochi i jeng y yhmtheaung kry pi ai nai tla. Naibaly Khumi cheang i reita y, ampo i yhmtheaung ly chapo chalu hawi chapo kasawi nini amji iy amtym ai tla. Na i py  chapo chalu hawi kasawi my  paji pi baly chapo salachi py ampo i yhmtheuangchi atym pajau. Hini ly ampo i yhmtheaung amtym nai leaungsai ne.

                Amjo chalu (amjo kalen) i yhmtheuang ly amnau kasawi my amtym ai tla nai kamta, amnau kasawi i yhmtheaung py amjo kalen (chalu) my amtym ai nai reita awm, sala teingtawi i yhmtheaung ly sala teingtawi amtym ai nai reita awm.Na i py amjo kalen i, amnau kasawi i yhmtheuang amtym ai nai ka-vo awm lawh baly amtym tanga ai tla.

                Khumi cheang i reita y amh’m ampo i yhmtheaung ly chapo neampachochi naini amtym ai nai reita awm teu i py, chaniu veampachychi ly yhmtheaung amtym ai nai reita by y. Chaniu neampachy yhmtheaung amtym ai nai reita by y nai lam nyhrei awm nai ne. Ha-rei nai ly cchaniu neampachy juvo i cheang theaung mang y abawi veing i ampo i amjy ly  amyn y awm jo nai khyh. Hunai deaungkho y yhmtheaung amtym sang y nai ne. Nyhrei nail y chaniu neampachy ai yhmtheaung amtym hai baly khri pa-rei akhi, a-awi i khrukhra theu pajau nai ne. Ati molam mo nabaly meaungcha py abawi nai ne. Khumi cheang chi i leaungsai ly cheaungkhangra y neampacho my lu sa nai ne nai y, juvo my yhmtheaung peang vui nai ne. Chanau so y naimy aju neampachy  deih vui lawh baly yhmtheaungchi ly juvo my peang veing ai; juvo deih baly juvo I amjychi my amtym ai nai reita awm; hunai deaungkho y chaniu neampachychi ai yhmtheaung pei y nai ne.

                Amh’m ampo i yhmtheaung amtym sang nai khumi ly amjo amnauchi ai yhmtheaung paji y nai ny y i, ampo i kalum kalai nga ai nai awm nai, peh ai nai awm nai bebechi avo nai kamta amtym ai tla nai ne. Yhmtheaung amtym sang y nai khumi ly amh’m ampo i leu tangai y naimy amy i ngai nai neampachy ai la iy yhm lang takhra veing baly yhmtheaung ngo sang y. Ampo hawi yhm vanrei awm iy amh’m ampo ai tavau  kho y deung patlum nai hawi kasui kaphui amdai nai khumi ly yhmtheaung amtym nai avo nai ne.

Pi Chit Maung