SUMNGAITANG LEAUNGKHEN NGA NAI ACHIH

Jangni kha y avang harie ra y ly Langjyhn hawi  Langtym napie nai amjo amnau leaung nyhrie awm. Nini amjo amjo amnau ly sumtavui, sumngai py kalang takhra amso mawi py ngo vi y. Avangchie my mawicheng pei nail y sumtavui, sumngai nga iy py jangvui pei khyh bo. Hunai deaungkho y nini py khri parie kajie I, pie sa bo. Pie sa mang baly sumngaitang leaungkhen ko bo. Sitho my ly huni sumngai-tang leaungkhen ail y pa-aw nai deaungkho y deih hai y. Nini amjo amnnau ly sumngaitaung leaungkhen I kheulawi ai padyh, padyh cham mang baly, sumngaitang leaungkhen ail y avum I, kano ly o-y pasie bo. Kano o-y naimy avang y atli hai baly,”Kani py sumngaitang leaungkhen nga I, angjeaung ai nai jeu u pa,” nanai thai hai bo. Huna nai avang I khumi leaung palyh, leaung pangrie palau nai tym mang baly sumngai veu ly by y pasie lawh bo.

Nini y ly che nai, pathawi nai kateing ny y na bo.”Nangni ly jangvui ataing nai teu, nangni ai ly jangvui kang pei jo jo ai,” napie ra r abo. Hunai deaungkho y kajie phi nai yhm y vawi y bo. Sumngaitang leaungkhen I kheulawi padyh veang veang nai, sitho I aheaung lukui theung y tyhp, aheaung paikho y tym na bo. Tym mang baly, “Kai I hlau y cha nai, pei y ko nai sumgaitang leaungkhen ly nang I lukui theung y kun jo na n,” napie bo. Hu aheaung taki y bi (=khen) tin na- I, “Huni aheaung taki I nai neng ho!” napie nai tla. Sitho my vaidyhm hi y i-rai, napie bo. Sitho ly chaniu leaung nyhrie awn. Sitho ly Langjyhn, Langtym amjo amnau leaung nyhrie teng y, thaibu teaungrie, thaikem teaungrie apreu pie bo. Huna nai kha y baly chaniu anglo nini sala y pa-I hai I, nini ly pi pi angto y. Thaibu Kei nai py, thaikem kei nai py pi pi atahu y. Khutawi jy parie i-na bo nabaly, chaniu teng y,”Mana jangdyhm ly, aw nein i awi!”nanai deing khala baly, “Pei jy na pa, angto y na, teu bo,” napie lawh bo.

Hunai y sitho nu yhmkeung my ly mana thui mo nabaly, “Aw! Ami I chopui chovui kahawi cha lawh teu bo I, nangmy I atlyhm nai meingtym paleungvui ala nai meingtym y paleungvui alo teang pa, napie bo. Nini amjo amnau vawi alie teang mang baly hu y paleungvui  ala teang bo. “Vai khawn ly by y leang bo; jangdyh I nangmy ni I niu nai meingtym y tym teang veing bo. Alie phai alie hawi teang. “Alie teang nai kha y baly kano ai o b abo.” Hunai khala ly nini amjo amnau ly avang y palau bie nai tla. Huni nai kha baly, Langjyhn, Langtym  nini I sumngaitang leaungkhen angjeaung ai nai Vawisyhn, vawilang chie ly, “Vawisyhn lamjam daw, vawileung lam thau ru,” nanai a-eu iy, angjeaung nai khala baly yhm y tymbo. Tym bon a baly huni jangvui pei jo naichie py pajei pie jo nai tla. “Hy! Nangmy I jangvui lo teang ba.” Hy! Nangmy I sumngaipeih lo teang ba. Hy! Nangmy I kano peih lo teang ba,” nanai amy I mawi y pei teang bawi bawi bo. Nini I sumngaitang  leaungkhen mawi ly ami ai py pei y.

Hunai deaungkho y Langtym ni I akei tameaung pui ly vai Kajau mawi y awm jo bo.