Khumi Pri y Mana Pasang ai mo?

                                                U Kannen Hawi Sau
Khumi amjo amnau na chi bawibawi noso hawi nai  my awm u sy, kamlo mang dindai ri chiu kang sa pi jojo nai ne. Khumi pri y pasang thai ai nai aniu y tajyh nai kai I kadawn sai chi phain pie ky ba.
1. Universty lyn nai chi amy khumi pri kavui mana sa ai moh? ( Sittwe Universty, Madalay universty, Rangeung university, kalang mang universty lyn nai chi hawi py ne sy, achi khumi bawibawi ly media hawi atho sa u khyly hawi ai ngaw khyh. leungleung ri media hawi akawm thai pa rei atho sa u tla. ) Vaini neing ly media hawi kalop sa nai neing ne. Sittwe universty lyn nai chi ly,( khumi student community ) ha ri sa u tla. Yangon, Madalay universty lyn nai chi py, (khumi student community) sa u tla. Momang amy khumi pri hawi ai kavui ly, nang chi university lyn nai chi teng y awm nai ne. Nang chi deaungdi chi i kiu theung ai awm nai tla.
2. Pastor bawibawi chi py, nang i kamkawm, kai i kamkawm, ti y nai my amy khumi pri, ii alaw thai bawibawi ai, kavui atho sa u khyly hawi keh ai ngaw khyh. Khumi office ha rei sa u tla.
3. Achi khumi, Tavaimi theung awm nai py ne sy, Beilei (police), theung awm nai chi py ne sy, leaungleaung rie amy khumi pri hawi ai nai kavui manai sa baly hawi keh ai moh nanai media hawi kamtawm sa pajau u khyly hawi ngaw khyh.
4. Ami kalang kamkawm ra ai awm nai achi khumi bawibawi chi py, media hawi amkawm thai u khyly hawi u ai.
5. Meiteaung chi py, my chi vui kamkawm sa kha amy khumi pri kavui manai sa baly hawi keh ai moh? lo ri tlen rie arum u thai khyly hawi keh ai ngaw khyh.
6. Achi khumi pri hawi ai nai kavui ly, khumi leaung rei my sa ra ly ngo pajau y, khumi nanai paleung ha rie khai kha, leaungleaung hawi, arum apang kha, kalop sa u khyly hawi keh ai ngaw khyh.
7. Achi khumi ly, ni ly mama awm moh? mani pri ai awm moh? nanai py pany pajau y bo. Hinai kamta achi bawibawi awm veve a nabaly, khumi pri thui u moh , khumi cheng py tama keing ai.
8. Achi khumi jangni kha y ly, leaungleaung rie py vaineing awm nai tla. Vaini neing ly achi khumi ly vaineing by y nai kamta awm u law bo. Achi khumi chi i awm nai sai khen baly khri paleung ama hawi prai nai ne. Momang y leaungleaung rie khumi pri kavui atho bawibawi so u sina ba.
9. Amy khumi pri, hawi ngai baly, leaungleaung rie amkawm thai u tla, amy cha, amy leu py, bawibawi kawp u tla. amy cha amy leu kawp y baly, khumi pri kavui manai sa thai ai mo?
10. Tama ly Tama meitym awm nai tla, tavo ly tavo meitym awm nanai py, Tameuh leu sai theung nang chi bawibawi niu u nai tla bo.
11. Achi khumi ly hinai kamta awm veve a nabaly momang saneing 10 baly tama ai,  ( 100% ). Honai deaungkho vaini achi Palangvum mang ai awm nai amh’m, ampo chi i, tangka awm nai chi ly, my chi i chapo, chanau chi ai (India ) mang baibu cheaung lyn nai ra atho sa hai  khyly  hawi keh ai nai ne. Huni lam ai tako hai y baly, kalang lam ly by y bo. India mang leaung (300, 400) mang Baibu cheaung lyn hai nai chi awm nabaly, momang y ly ni chi my, amy i khumi pri kavui atho sa ai nai nga ai. Hini leu sai ly, amh’m, ampo chi my atho sa pie ai nai ngai. Amy chapo, chanau chi ai, aju la hai, javo la hai nai mang ai tako hai ra ry ly ne y bo. Cheing nai mang ai lam pahawi u tla bo.
Hini leu sai ly, kai my ai amlo nai ne y, amy amh’m ampo my tapen nai mietym, khumi pri hawi ai nai ngai hai nai deaungkho y thui nai teu ba.
Manai atho sa moh nabaly, hinai kamta atho sa baly hawi keh ai ngaw khy.
1. Kristian kamkawm mang atho sa ai.
2. Khumi Reita kamkawm mang py atho sa ai.
3. Buhdha kamkawm py atho sa ai.
4. Buhdha, Kristian ne y nai chi py kamkawm hawi atho sa ai.
Hini kamkawm 4 ra y lu sa nai chi ly, sangum ha ri pala u tla.
Hawi keh nai ly ( YMCA ) deaungdi kamkawm hawi keh nai ne. Amy chi pri hawi ai nai kavui ly YMCA deaungdi kamkawm chi i kiu theung ai awm nai ne. Hini kamkawm ai ly mipui bawibawi atho pei ai tla. Jangni y England pri ly, vaini achi khumi pri tleaung mawm nai ne. Na iy py ( 1888-1959 ) y BruceBairnsfather my ( YMCA ) pado bo y pri hawi pajau nai ne. Achi khumi py honai kamta ado u khy ly hawi keh ai ngaw khyh nanai kai ly athang khai pi. Tamang nai chi awm baly pahen u kyh ba. Nang chi sa nai ra tlei rie Tameuh my amtheung hai u sy ba. Kawm prai..

Tahm khai
Aisau
Denmark