THAISAPHA THI APAJUI NAI ACHIH

                Jangni jangkhawn y amjo amnau leaung nyhrie awn i, ‘Tliujo’ nini ‘Tliuthang’ napie.Amjo Tliujo ly neng i, amnau Tliuthang ly khri parie kamawn nabo. NIni ly saleaung vanrie y awm iy py amjo Areng Tliujo ly my I yhm y areng sorai sa I, mawi biu phai cha nei ai nai kha y py amnau kamawn Tliuthang ai ly tlenrie py heang vai y. Amnau py leh vai y. Amjo areng Tliujo ly kani tleihrie miso mingan chie ai cha-y pang py pasau, do pang py psau, Sipui, Si tai py kani tleihrie pakheing nai tla.

                Hunai kamta kani tleihrie avang saleaung miso mingan chie ai tahmu pateing nai neing kheih nai bo baly, areng Tliujo ly aneing akheaung y adawn cham mang baly,

“Aw..Kai ly kai my I nei taku hei ahawi nai bechy Tliuthang ai ly tlen rie py heang vai y ly!,” nanai paleung kadawn adawn iy, mymy ly Thaisapha kangmyhn la iy, mymy I ngan y apaju teu teu kha y, lam teng y tliu jo bo. Hunai nai y “Tliujo” napie nai tla.

                Nai mang baly amjo Tliujo ly mymy I miso mingan chie vaichi y mawi phai biu phai pei nai amnu ampochie, avang saleaung chie ly lam y tliu jo nai avum kha baly, “Oh! Naisa awi..vaini ly vaichi y ly nangmy I “cheinghawi kani” hawi nai kha y ly mawi phai biu phai cha nai, hmu pang, do pang nei ahawi nai chy ly! Vai ly amy taku neng y kha y ly kanam thai y chy ly!” na iy seaung pan jo bo. Naikamta ly vai miso mingan chie, khuma naisa chie, avang saleaung chie leaung leaung rie te I py, hunai kamta thui iy, be be seaung pan veing be be bo.

                Nai bo mang baly, kang khyhm y te nail eh nai mymy I amh’m taku y vanrie hei ahawi nai kamawn khumi amnau my avum mang baly, “Oh! Jai awi, vaini ly kasi keung tleaung na, kalai keung tleaung na, Kai y! jai y!” na kha vo veung nai, meih katui sameung naimy, tleirie my tapawm lawp bo. Na kha ly paleung hawi y I, “Jai ly jai na ang ly, be ly be na ang ly,” nanai adawn palai teang bo. “ Amy I amjo amnau kyp kyp ly ami my pakhau baly, ngai y” nanai pany jo bo.