Khumi CHY hawi Khumi CHA (2)

    Kai ly khumi chy hawi khumi cha nanai kaimy pany nai ryrei tlenrei amti chum nai ne. Huni kamtawm y leaungsai harei amti bi ai nai ngai. amlau moh, amlau y moh nanai ly achi adawn ahawi sina ba.
    Kalop ly amy tlai sa nai tleaung y leaungleaung tangai ahawi, amkawm ahawi, arum apang ahawi iy sa baly tamang nai py di ai nanai kai ly dawn nai ne.
    Vai achi Palang vum ka-peang y khumi cha kawp keh naichi ly neangneang by y bo. Kai ly khumi cha amtiu hawi hai y nai y kawp naichi i kheu kan y kai pajau y leang. Mychi i kheu di ryrei malawm py apho pajau y nai ne.
    Thui chum nai leu sai y thui bi ai nabaly khumi cha kawp nai ly cha sa ai nai kawp nai ny y leang nanai pany hai bi ai ngai nai ne.
    Nang teng, kai teng nanai thui, katheu nai awm nai kamta ly nang khi, kai khi nanai py achi ly teaung reng nai ne. Huni amjychi y nabaly vai ni achi teaung iy py amlau nanai leu sai pacheang nai saichi sa i khaly, huni ly khumi cha ai sa palai nai ny y i, khumi cha amlum, angym hai nai ne ngaw khyh nanai kai ly dawn.
    Nai baly tui du, tui vum (ta vum) nanai py arum cham sina. Hinira y tuidu a? tui du a? tuivum a? tui vum a? ti y baly tavum a? ta vum a? nanai awm nai saichi py khumi cha kawp naichi ly hawi hai patiu i khaly hawi ai ngaw khyh nanai py dawn.
    Vai harei thui bi ai nabaly, nabaly nanai ly teng a? na baly nanai ly teng a? nanai py na nai tajiu avo a? Huni cha i tabom amtawm nai, taprei patle nai saichi ai vai khumi cha i awm nai sai y pany naichi my thui pi pachai nai saichi sa i khaly hawi ai ngaw khyh nanai kai ly dawn nai ne. Hunai y sapi pajau baly khumi cha i awm nai sai angym ai nai i vui y kawp nai, pany naichi my dawn hai nai ly khumi cha ai sapalai nai tleaung y tahm awm ai nanai kai ly dawn.
    Hi y kai i avum nai sai harei amti pi ai ngai.
    Areng Frances hawi Areng Rai Le mymy ni ai kai deaungdi khala cha tajiu vai. Palang vum i satang hawi Kamkawm i satangchi tajiu vai nai ne. Angchei i tajiu nai ly Bishop Theaung Hawi lawi pa i Bishop vawi nai khala kai y amti pi teang nai ly kai i tajiu nai khumi cha ly teng y nanai pathang nai sai thui pi teang nai ne.
    Kai ly Areng ni ai tajiu bi nai khala nini i kai y pathang teang nai leu sai harei ly "Deung kangthauchi ly khumi cha y taphra ai bo ngaw khyh nanai kadawn kun i amo theu y" nanai pathang teang nai ne.
    Huni ly ati moh nanai kai ly adawn thai y. Saneng 1993 bo i baly kai py cha tajiu vai y bo. Khumi cha i awm nai sai y py adawn vai y bo.
    Vai ly huni Areng ni i thui nai ly Vaini neng y thui nai ngaw khyh nanai hawi, hunai kamta thui nai py kai ly khumi cha y kaimy i pany nai kamta ra-awi nga baly teng bo nanai dawn iy Areng ni ai tajiu i paleung amo theu y nai ne ai nanai kai ly vaini adawn cham nai ne.
    Hunai y achi ly khumi cha ai taphra naira tym y parei khumi cha angym ai nai pajau nai ryrei atho so sina nanai hini ryrei hawi vaini ly amdaw rai sina ba.

    Pri Dai

စုိးသိမ္း(ရန္ကုန္)