Khumi CHY hawi Khumi CHA (3)

Vaini ly leaungsai harei adawn bi cham sina.
Khumi cha ly vaini phra angchi khyp bo a? nanai deng ai nai awm. Ne, phra bo nanai py thui ai nga nai ne. Mana nai y hini leu thui moh nanai phyrei ly deng ai ngaw khyh.

Khumi cha ly ami kalang cheangmy taphra nai ny y. Khumi leu kawp iy khumi cha y py kamlau ryrei kawp nai khumi chimy taphra nai ne. Huni theung y kai py abawi nai ne. Nang py abawi law ai ngaw khyh.
Ati mana nai y moh nabaly kai py khumi cha y maiden chyrei pany khyh. Khumi cha y phain ai nai py kawp khyp nai ryrei awm khyh. Na iy py tajiu ai nai ly pipi kawp y rai nai ne. Kai ly khumi cha tajiu ai kawp y rai nai deaungkho y khumi cha y hawi hai tajiu kawp ai nai, patiu pi nai keung awm baly khri hawi ai nanai adawn.
Vai ly khumi cha i awm nai sai, khumi leu i thiu nai saichi ly hawi hai pany y rai khala y my khumi cha ai tajiu ngaulau nai deaungkho y khumi cha ly phra bo nanai kai ly amti pi nai ne.

Na iy py vaini achi ly khumi cha i awm nai sai pany ai ngai baly DICTIONARY by y rai nai deaungkho y TAMEUH cha-iu napi nai, Leu Maikawm kangngym hawi kangtha ai khumi cha patiu pi nai keung kamta dawn baly kang jai, kang jai hawimy khumi cha ly tajiu nai teng kyh, amlau kyh ai nanai kai ly atho pei ai ngai.

Cheang takhrachi i leu ai khumi cha mang y tapeang ai na iy py huni Tameuh i cha-iura y phyrei ly awm, angym nai ne. Cha i awm nai sai py angym nai ne. Hawi hai dawn iy khen ai nabaly khumi cha i vang teng nai, thiu nai sai niu ai mang.
Vai achi ly khumi cheng hawi khumi pri ai khrei nanai thui, dawn, sa naira y khumi cha i awm nai sai y hawi hai pany ai nai py aly len nanai kai ly dawn.

Kai i tajiu nai khumi cha ly teng bo nanai kai ly thui vam y. Kai ly khumi leu i kathiu, kateng pany bawi y nai kamta, huni khumi leu ai tajiu nai, teaung nai chachi niu vai y, niu parei py atho so vai y nai y kai ly khumi cha ai phain kawp nai ryrei awm khyh. Khumi cha kawp nanai theung y abawi y rai nai ne.

Hunai y ati py ne sy, Nang hawi kai ly khumi cha y taphra nai theung abawi law be hi ly! nanai dawn nai tarawi y khaileaung pri ai awm nai cheng takhrachi hawi vanrei khumi cha ly chymme naimy angdo jojo pajau thai ai nai pany nai ryrei, sathai nai ryrei hawi my khumi cha ai akry ahawi sina nanai takeng nai ne.

Khumi cha tajiu ngaulau y naimy amlau nai ryrei tajiu sina, kawp y nai y py paleung phra y naimy vam parai nai hawi atho sa iy, tajiu nai sai amtiu sina nanai takeng nai tarawi y khumi chy ly khumi cha ai kry jo ai nai pany kawp naira angym sy.


Pri Dai