PKC my Lu sa iy Malaysia y awm nai Khumi chi dyn rei Pinic theu

Malaysia, August 21--- Malaysia y awm nai Khumi chi avum achu iy Kau lo kani 19 (19/8/2012) nari 2pm kha y PKC jeung mang deingdai rei ROCK ECO RESORT HULU YAM tavo ra y chei u nai ne.

Hini meitym y chei ra y abawi nai ly miteaung 45rei, deaungdi ly 5 rei abawi i hu y dyn rei jei nanai satang nga nai tla. Huni meitym i nai khawn mang nari 10;30am y vawi teang nai ne.

Huni meitym y tym nai hawi phy rei ly amhau, phy rei ly biu ang theaung, dyn mang nari 11pm nanai neing kha y ly lei nai khumi bawi bawi chi hawi meitym harei y achu iy Ai Lwin Lwin my kamang y leu thui pi nai ne. Mymy i thui pi nai ra y ly PKC momang hawi ai nai , khumi pri asang ai nai, KMG y tahm pasang ai nai chi ne.

Huni bo y leaung leaung ka-lei cha leu thui ai nai neing pei nai ne.

Jeu nai khumi bawi bawi chi py amy paleung theung awm nai leu sai chi thui nai tla.

“Ati kavui hinai sa nai mo nai baly...PKC amteaung nai ly saneng 9rei awm bo. Takhra meitym lei ai nai PKC lu sa nai chi py by vai y nai ra y vai neing amteaung anchih nai ne” nanai PKC i secretary Ai David Zarli my amti nai ne.

Malaysia y awm nai achi Khumi bawi bawi ly leaung 1000 cham y bo ne. Hini Malay y awm nai khumi chi angyn iy khuleaung vamrei chei pajau ai nai ly pasa ly PKC kamkawm  mang my pasa patheu nai tla.

Huni bo y Ai David Zarli my thui pi bi nail y “vai momang y py hinai kamta paleung angyn atho sa iy saneing rei y tleangrei sa jo ai nai kavo sa patyp ai nai thui jo nai ne. Vaicho vaicheaung kha y ly hinai kamta so vai y teu iy py vai neing kha y hinai kamta sa pajau nai ly vai PKC y lu sa nai chi ly khumi cheang y khri khri khrei nai paleung awm prai nanai kai ly adawn nai tla” nanai thui nai ne.

Hinai kamta sa ai nai avo parei atho sa lu sa nai keung chi ly PKC i coodinator-Ai Lwin Lwin, Chairman -Phei Uk, Secretary - Ai David Zarli, Treasurer- Ai Tuang Pu, Advisory- Lt Ko Yet, Jimmmy hini chi my ne.

Satang pei keung – Ai David Zarli