Sarama Daw Um Khin ai Interview Sa nai

Meingtym    : Daw Um Khin i Yhm

Neng          : 11:30 AM

Interview sa nai keung: Ai James San Aung( Samleaung lengngau),Yangon

Sarama amy ai kai chi KMG mang dengdairei interview sa nai ngai nai tla he.

Deng nai         : Sara awi, KMG na nai ly ati ang jyp ai thui nai mo? Naibaly, huni hawi amtawm iy momang ati sa ai nai adawn nai awm mo?

Pathang nai    : Ne, sarama awi, kai chi i vai pado ai am teaung nai “KMG” na nai ly “ KHUMI MEDIA GROUP” na pi nai ne he. Hini KMG mang dengdairei vai kaichi ly lo nyhrei y tlen rei “ Japang Ra-awi” na pi nai satang cha patheu ai nai ne ba. Vai ni media sa nai leaung sai ly hina nai kamta ne he, vaini achi khumi cheang chi ly development mang y khen ai na baly khri pa-rei patyh na nai ne ba. Hunai deaungkho y kaichi ly achi khumi pri cheang naira mang y maiden chy rei mei avang hai ai nai hawi,

khawn vai y ly Khumi pri i vui kasabawn nga thai ai nai NGOs harei lawn pa-rei atho sa ai nai vaini kaichi adawn nai ne ba.Kawn p’rai.

Deng nai         : Sarama amy ly vai saneng maji rei awm bo mo, kai chi ai thui pi pajau na a?

Pathang nai                : Thui pi pajau teu chy. Kaily vai saneng 57 rei awm bo he.

Deng nai                     : Naibaly, sarama amy vansawi sarama sa nai seneng ly maji rei awm bo mo,  kaichi ai        thui pi pajau na a?

Pathang nai    : Kaily vai hawi nabaly asi sarama sa nai ly saneng 24 rei awm bo he.

Deng nai         : Nai baly, Sarama awi, amy vansawi sarama leaung rei lawn thai ai nai mani meingtym ra y cheaung lyn nai mo, na nai py thui pi cham rai be. Kaichi py pany pajau na a? Amy i sara ly ami mo?

Pathang nai    : Kai ly Kaichi sangdeang lyn nai bawi bawi ly leaung 135 rei awm nai tla. Kaily ( kamaya 103,Tatma 99, Taung twin gyi ra y cha amtiu nai ne. Kai ly saragyi U Tin Ko teng y cha amtiu nai ne. Naibaly, kaichi ahawi bawi bawi tleaung y kai ly cha kalang chi kamta hawi hai palai kawp y teu iy py; Dr. Ko Gyi peang nai neng kha y ,ni my kaichi ai medical hawi amtawm nai chi cha mei bawi chei nai kha ai nabaly, asi hawi amtawm nai pany naira (knowledge of medical terms)cha mei bawi chei nai eaung nai amyn cha rang patheu kha y na baly, kai ly 1^st  reward nga law nai ne.

Deng nai         : Kawn p’rai, hunai kamta 1^st reward nga ai nai mana sa nai awm mo, kai chi ai thui pi kyh ba.Pany pajau na a?

Pathang nai    : Ei..., kaily sangdeang lyn amteaung nai angchei kani kha i dengdairei, asi hawi amtawm nai pany sang nai cha chi ai pany chung cheu pa-rei phain yb nai ne.

Deng nai         : Naibaly, sarama amy ly mani meingtym ra y vansawi sarama sa nai mo? Amy i kalop ly ati ang jyp meingtym ra y mo?

Pathang nai    : Kaily palang vum mary y awm nai Prithu Sireung ra y Amhm hawi deaungdi chi ai kry nai meingtym ra kalop sa nai ne.

Deng nai         : Amy ly ami deung kha y sarama sa nai mo?

Pathang nai    : Kai kalop sa nai neng kha y, Sara U Aung San ly General M.A rathu hawi huni sireung ra y kalop sa i, Sarama Daw Kyawk Kyawk Khine ly nurse mang y lusa nai kalen keh ne. Kai ly ni i anui y kalop sa nai ne.

Deng nai         : Vai ly, sarama amy ly mama y awm mo?

                           Kai ly vai (1^st )Thei, Hlaing Thar Yar mary y awm.

Pathang nai      :  Kawn parai ba.

Deng nai         :Kawn p’rai. Naibaly sarama awi, amy i asi hawi amtawm iy sa chung nai chi py ne sy, vaini sa thym naira y py ne sy, nang my i kalop sa nai kha y avum nai leaung sai chi hawi amtawm iy vaini khumi thawndeang anglo chi ai mani hawi dengdairei taviu nai leu sai chi thui pi ai nai ngai mo? Kaichi ai thui pi kyh ba.

Pathang nai    : Vaini asi hawi amtawm iy khumi pri y khumi kano chi ai hawi hai palai kry ai nai hawi, sabawn ai nai vui vaini khumi deung kang thau thawn deang anglo chi ly acho-ra chi i sa pi nai cheaung chi, University chi ra y cha amtiu nai chi neang awm nai ne ba. Na i py vaini ry rei ly, doctor degree nga nai chi ly ami py by y rai ba. Dr.Aye Kyaw leaung rei na nai hohawi amtawm iy sa nai, vai nabaly, Palangvum mary y kalen keh kamta lawn bo he. Naibaly, vai Mandalay mary y  awm nai University ra y  homang i medical doctor cheaung lyn thym nai Ai Lin Kai leaung rei awm.

Naibaly, vai ly achi khumi theung y py vansawi sarama sangdeang eaung nai chi py neang neang awm nai ne bo. Na i py, nawi keh nai chily, amy i kalop y khrei u y nai saho y khumi kano chi ai py hawi hai palai khen y,kry u y.

Hunai deaungkho y, vai kang khym ka-tem y taviu pi ai nai ngai nai leu sai chily: Amy i sa nai kalop ai khrei ai nai hawi; khumi kano chi ai tahm khai kawp ai nai py khri pa-rei paleung theung y tamen y nai pa-rei adawn jo ai nai tla. Khumi pri i vui nang chi bawi bawi atho sa iy, sabawn ba. Khumi Media Group kavui y lusa nai nang chi teng y Tameuh my amtheaung hai jo jo sy!Amen.

 Kaichi py hinai kamta pathang pi nai sarama amy ai khri pa-rei kawn p’rai na nai KMG mang dengdairei kawn nai leu thui teang nai ne. Tameuh my kry jo jo sy! Amen.