Chin pri Electronic Power momang kanawi nga ai nai kavui mipui chi pany thai ai thui pi nai

Chin pri veiri electronic power ( EP ) hawi ai nai kavui deing nai leu sai  Chin pri vawnkyichi, NGO/INGOkalop sa naichi, avang amh’m, ampo leaung 300rei hawi Kau lo kani saryh (07/08/2012)kha y Hakha mary pui hall ai avum pawi sa.

Nichai kry keung vawnkyi lukalen U Zaw Min Oo my Chin pri vawnkyi kalenkeh molam thui pi nai bo y, Chin pri EP vawnkyi U Cin Lian Pau my, Chin pri ai EP kalop sa nai sai, sa y nai chi ai amti pi nai tla.

Pyithawnchu no 2 EP vawnkyi U Win Maung my, EP Chin pri kalop sa nai hawi, reisa pri kalop sa nai chi thui pi nai ne. Huni bo y Chinpri EP prineimu my Chin pri ai kalop sa nai sai hawi, budget sa nai ra y powerpiont pany hai nai tla.

No,2 vawnkyi ( prithawnchu ) my thui nai ly, “Chin pri ai Diesel hawi mai peh ( mai ) nga mangnai ly Falam hawi Palangvum ne i, 1950 kha mai nga. 1958 kha Hakha, 1968 kha Tedim, 1987 kha Matupi, 1965 kha Mindet, 1983 kha Thangtlang mary kapeang kalang chi py Diesel hawi mai nga nai tla. Huni bo y pri py hawiryh, hawiryh i, 1984 kha Hakha ai tui electric sa nai tla. 1986 bo y kalang mary kapeang chi py tui electric sa pi nai tla”.. nanai U Win Maung my thui pany hai nai tla.

Chin pri ai electric tui hawi mai avan thai ai nai kavui hau nai khaly hawitleaung hawira ai avang kavui py, mary kapeang avang hau kha byly, Kanpalet, Ton Zam, Matupi,Rhikhawrdar hawi  Chikha nichi ne nanai pri-nei EP vawnkyi U Cin Lian Pau my thui nai tla. Kanpelet mary ka-peang ai sa ai nai ly 2100 kw sa ai i, Japen i la nai chau hawi sa ai napi.

Vawnkyi U Zaw Min Oo my, Chin pri veiri ai avang 1370 awm, alylen keh nai avang ly, 326 ra tui hawi mai pei bo napi. Avang 1044 avang chi py mai nga thai ai nai kavui, khri pa kalop sa ai ngai rai napi.

Prithawnchu no, 2 EP vawnkyiChin pri EP prineimu my thui nai leusai ly, tui hawi nai ra mai nga thai ai nai kavui hau ai nai vaini hi ai tym nai mipui bawibawi chi py adawn u tla napi. Kai paleung hawi y nai ly Dam.laiva, tawngva tbk. nichi ly KW khri diprai nai ne.Huni ra sa nai khri kra bo, vaini pri hawi nai thym kha hinai awm nai ly ami py khen hawi y nai tla.

Thuipi nai theung ai kalang chi my deing nai leusai ly:

1. Magawi, Kankaw hawi maha mai atho line 2012( 13) saneng y Chin pri Hakha avangpui ai tym ai bo nanai Burma jounal satangcha theung ai tajyh nai teng khypkhyp na a?

2. Thangtlang mary ka-peang India, Bawinu tavo India my tui hawi electric sa ai nanai satang ly salaw byly yhm lau phra ai nai awm mang, tlen 3 ri survey sa bo. Hunai deangkho y hini sa ai nai ly pyithawnchu my so u napi nai a, nai ne y byly Chin vawnkyi my so u napi nai a? Pyithawnchu achora my teng y avang mi pui chi my hnei nai awm a?

3. Avang bawibawi mai nga ai nai kavui meter box nang chi jo i miter box van hawi, sahai nai van ly tlau 100000 ks tla nai deangkho y, van praw kyh khyly hawi y na a?

4.Meter sapi nai ra y, tlau 1000 ks la nai ly nawi ala y a, kalang pri y ly van maji rei la mo?

1-4 Pathang pi nai leusai:

1. Kankaw kaso maha mai atho line ly 2012-13 simengkeing nai y, 2013-14 kha sa pajau ai ngaw khy, no.2. prithawnchu EP vawmkyi my pathang nai leusai ne.

2.Ampo my deing nai leusai ai pathang pi keing y.

3. Meter box van py annsen ly 70000 ks tla khy. van tla hai ra ly ngo y. hini bo y van la ai ne y bo, la ai nai py kai chi adawn y. kalang takhra chi ly mymy chi ngai nai vui ai ly mymy chi my private van u tla nanai Chin pri EP prineiuh my thui pi nai tla.

4. Nang thui nai teing, na iy py tlau1000 ks la ai kavui prithawnchu vawmkyi  my thui nai deaungkho van tla hai ngo y nanai no 2. Prithawnchu EP vawnkyi my thui nai leu sai ne.

HINI PANY THAI NAI arum nai ra y jeu nai miteaungchi, angan mang tym kha thui arum u nai ly: kai tama bo Chin pri theung ai ( Hakha ) mai nga ai nai kavui kalop sa na be, buget kavui py 2012-16 ryri sa ai nai thui nai py 24 hours mai nga ai nai kavui py thui y.Dong ( ruun )sa ai nai, achi thui pi nai leusai theung y, mai atho line meung kha y vaineng saneng khei bo kha, 24 hours mai nga ai bo nai adawn nai chi ly ngo pajau y leaung bo.

Hini thui nai leusai ai Kau lo 16-19 kani meeting sa teng ai.

Hakha cha ai, khumi cha mang palai nai ne. tamang nai awm byly pahen u kyh ba.

Hini cha khen u ly, vai chi kha kaso achi khumi meteung chi kalop sa nai hawi vani achi khumi amh’m,ampo, amjo,amnau bawibawi amy i khumi pri manai kamta atho sa ai mo nai adawn u tla bo. Ami cheang tleaung y, achi khumi pri Palang vum ai ly Electric nga mang nai ne. A chi tleaung kangkhyhn nga nai chi i, avang ai khen ai ngai bo. Amy i tapen nai miteaung ai amy chi khumi my private atho so y byly, khumi pri ly tama ai bo. 

Tahm khai 

Kanneth,Ai hawi sau

Danmark